കോള് എന്ന വാക്ക് മലബാറിന് പുറത്തു സാധാരണമായി ഉപയോഗിക്കാറുണ്ടോ എന്നെനിക്കറിയില്ല. ഉണ്ടാവില്ല എന്നാണ് എന്റെ വിശ്വാസം. കോളടിച്ചല്ലോ എന്ന് മലബാറിന് പുറത്തും ഉപയോഗിക്കാറുണ്ടാവണം, കാരണം അതൊരു സാമാന്യമായ പ്രയോഗമായ് മാറിയിട്ടുണ്ട്. പക്ഷെ ആ വാക്കിന് മലബാറിൽ ഉച്ചരിക്കപ്പെടുമ്പോൾ ഉണ്ടാവുന്ന ശക്തി മറ്റെവിടെയും ഉണ്ടാവില്ല. കോളടിക്കുക മലബാറുകാർക്ക് മറ്റുള്ളവരെക്കാൾ ശക്തിയിൽ ആണെന്നതാണ് അതിനു കാരണം. ശബ്ദതാരാവലി കോളിന് കൊടുക്കുന്ന അർഥങ്ങൾ നോക്കുക. കച്ചവടം, വാങ്ങുക, കള്ളസൂത്രം, കടലിലെ കാറ്റ് എന്നിങ്ങനെ പോകുന്നു ആ ലിസ്റ്റ്. ഈ വാക്കുകൾക്ക് പൊതുവായൊരു രൂപം വരുന്നത് മലബാറിൽ മാത്രം ആയിരിക്കില്ലേ? പണ്ട് വാസ്കോ ഡ ഗാമ വന്നതുമുതൽ—അല്ല—അതിനും മുൻപേ തന്നെ, പത്താം നൂറ്റാണ്ടിൽ എഴുതപ്പെട്ട പെരിപ്ലസ് ഓഫ് എറിത്രിയൻ സീ എന്ന കപ്പൽയാത്രക്കാർ ഉപയോഗിച്ച പുസ്തകം പ്രകാരം വളരെ പണ്ടേ മലബാറിന് കടലുമായിട്ടുള്ള ബന്ധം വളരെ ദൃഢമാണ്. കടലിലെ കോളും അതുകൊണ്ടു തന്നെ അവർക്ക് വളരെ പരിചിതമായിരിക്കണം. അങ്ങനെയാവില്ലേ, ജീവിതത്തിലെ സുഖകരമായ നിമിഷങ്ങളിൽ അവർക്ക് കോളടിക്കുന്നതും, “നിനക്ക് നല്ല കോളായി” എന്ന് പറയുമ്പോൾ പേടിയുടെ ആദ്യനാമ്പുകൾ അവരിൽ മുളക്കുന്നതും? കോളിന്റെ ഇഷ്ടാനുസരണം ജീവിച്ച മനുഷ്യർ ഇപ്പോഴും ഭാഗ്യവും സന്തോഷവും പേടിയും എല്ലാം കോളിൽ തന്നെ അനുഭവിക്കുന്നു. പണ്ട് കടലിൽ ആയിരുന്നെങ്കിൽ ഇന്ന് ഭാഷയിൽ.